Олон улсын Au Pair хөтөлбөр дэлхий даяар түгэн дэлгэрч, олон улс оронд хэрэгжихийн хэрээр оролцогч залуусын эрхийг хамгаалах, хөтөлбөрийн чанар, ёс зүйг нэг мөр болгох шаардлага улам бүр нэмэгдсэн. Энэхүү хэрэгцээ, шаардлагын үндсэн дээр The International Au Pair Association (IAPA) буюу Олон улсын Au Pair-ийн холбоо 1994 онд албан ёсоор байгуулагдаж байжээ.
IAPA нь Au-Pair хөтөлбөрийг зохион байгуулдаг агентлагуудыг нэгтгэсэн, ашгийн бус, олон улсын байгууллага бөгөөд түүний гол зорилго нь Au Pair хөтөлбөрийг жинхэнэ утгаараа соёлын солилцооны хөтөлбөр хэлбэрээр хадгалах, оролцогч Au Pair, хүлээн авагч гэр бүл, агентлагуудын хоорондын харилцаанд ил тод, ёс зүйтэй, аюулгүй орчныг бүрдүүлэхэд оршдог. Тус холбоо байгуулагдсанаар Au-Pair хөтөлбөрийг зөвхөн ажил эрхлэлт гэх ойлголтоос салгасан гэхэд болно.
1994 оноос хойш IAPA нь Au-Pair хөтөлбөрийн олон улсын стандарт, ёс зүйн дүрэм боловсруулахад гол үүрэг гүйцэтгэж ирсэн. Тухайлбал, Au Pair-ийн ажлын цагийн дээд хязгаар, амралт чөлөөт цаг, хувийн орон зай, халаасны мөнгө, хэл сурах боломж зэрэг суурь зарчмуудыг агентлагууд мөрдөх ёстойг тодорхой заасан удирдамжийг баталсан. Эдгээр стандарт нь Европын 1969 оны Au Pair Agreement-ийн үзэл баримтлалтай уялдаж, орчин үеийн нөхцөлд нийцсэн байдлаар хөгжсөнөөрөө онцлог юм.
IAPA-д гишүүнчлэлтэй агентлагууд нь хөтөлбөрийг зохион байгуулахдаа оролцогчдын аюулгүй байдал, сайн сайхан байдлыг нэн тэргүүнд тавих үүрэг хүлээдэг. Ингэснээр Au Pair-ээр гадаад оронд зорчих залуус найдвартай агентлаг, тодорхой гэрээ, хяналттай тогтолцооны хүрээнд хөтөлбөрт хамрагдах боломж бүрддэг.
Өнөөдөр IAPA нь Европ, Хойд Америк, Австрали болон бусад бүс нутгийн олон улсын агентлагуудыг нэгтгэсэн, Au Pair хөтөлбөрийн салбар дахь хамгийн нөлөө бүхий олон улсын байгууллага-ын нэг болж хөгжсөн.
